從計劃懷孕開始，無錯，係由計劃開始，
我已經同老公商量BB未來照顧問題，
每一個家庭環境唔同，
所以選擇照顧方式各有不同。
基本分為三大類，
- FTM (full time mom)
- 由長老代為照顧
- 工人照顧
因為屋企各種經濟因素，
加上唔想將屋企重擔放晒喺老公身上，
FTM就唔駛考慮，
所以雙職父母係我地必行既路
2. 長老照顧
有至親照顧當然放心，但針無兩頭利，
舊一輩同新一代照顧方法各有不同，
雙方難免會有微言，
最怕係會影響自己同長老們既良好關係。
長老們寵孫係必然既定律，唔好打算阻止/干涉，
因為，當你返工時候，阻止唔到亦干涉唔到，
當然唔係每一個長老都盲目寵孫，
我亦見過理智型長老，將孫兒照顧得好好又聽話。
可惜我兩邊長老都係盲目寵孫型，
所以⋯不會考慮
3. 工人照顧
搵姐姐就好似賭博一樣，
運氣好既，會搵到個愛錫自己小朋友，
識得照顧得好好，
但同時，愛錫小朋友亦唔等於識得照顧，
就算愛錫，識照顧，就算媽媽授權，
工人姐姐亦未必用心去教導小朋友，何謂對同錯。
就講自己身邊，見過小朋友蝦姐姐，
亦見過姐姐帶小朋友只顧玩電話。
所以，喺小朋友仲好細既時候，
我地亦無請工人姐姐既打算。
喺種種選擇之下，
我發現咗原來有個地方，叫育嬰院。
育嬰院係一個主要照顧0-2歲小朋友既地方，
除左照顧起居飲食，
亦會幫佢地大小肌肉訓練，感管訓練，
甚至加固，大D就開始學習自理，
去廁所戒片片等等。
如果叫我搵一個形容詞，
我諗就係嬰兒版既幼稚園。
價錢唔算平，比工人姐姐月薪為高，
但如果照顧得好，又有野學，我地覺得值。
但育嬰院有個唔好處，就係每區太少，
學位不足，變相入學有難度，
育嬰院通常以小班教學，以年紀分班，
因為bb始終需求高，
一個老師最多平均照顧6個小朋友。
做好一切資料搜集後，
再喺婦產科醫生診所拎左預產期証明之後，
就立即email去申請排隊入學，
因為知道學位緊張，所以我約7週已申請。
（每間育嬰院準則唔同，
有部分係約4-5個月先開放申請）
直至收到入學通知前，其實都幾緊張，
因為bb早產，產假自然比預計早完結，
直到BB出世一個月多，好好彩已經收到入學通知，
Bb同其他小朋友一樣，9月份就已經入學喇，
下一篇再分享一下園內生活。
